Скопје денеска одбележува 81 година од ослободувањето во Втората светска војна — еден од најзначајните датуми во историјата на македонската престолнина.
Во чест на овој ден, делегации од институции и организации ќе оддадат почит и ќе положат свежо цвеќе на Партизанските гробишта во Бутел, на Алејата на заслужните граѓани, како и на споменикот „Ослободители на Скопје“ на платото пред зградата на Владата.
Традиционално, Град Скопје ќе ја додели Наградата „13 Ноември“ на поединци и институции кои со својата работа и посветеност придонеле за развојот, афирмацијата и унапредувањето на главниот град.
На 13 ноември 1944 година, борците од 42-та и 50-та дивизија на Народноослободителната македонска војска, заедно со 16-та македонска бригада, по неколкудневни жестоки борби со германските сили, го ослободија Скопје од фашистичката окупација.
Во борбите учествувале и припадници на 22-та германска гренадирска дивизија, составена од 47-от и 65-от полк, како и делови од 11-та воздухопловна десантна дивизија и тврдинската бригада „Ангермилер“, распоредена пред Качаничката клисура. По победоносниот марш, македонските борци влегоа во градот и го означија почетокот на новото, слободно Скопје.
Во борбите за ослободување на градот загинале 420 македонски борци, а за време на целата војна животот го загубиле над 4.600 скопјани.
Македонија беше дел од антифашистичката коалиција, а според историските податоци, за време на Втората светска војна загинале околу 33.000 луѓе, меѓу кои и над 7.000 македонски Евреи, депортирани во нацистичкиот логор Треблинка.