Во Општина Маврово и Ростуше, во тековната академска година, право на еднократна финансиска помош остварија 44 студенти запишани на додипломски студии од прв циклус на јавните и приватните универзитети и високообразовни установи во земјава за академската 2024/2025 година.
-На јавниот повик објавен во декември беа пријавени 45 студенти, редовни и вонредни, кои не се вработени. По разгледувањето на доставените пријави, соодветната комисија одлучи 44 од нив да го остварат правото на финансиска помош, што е за 25 студенти повеќе во однос на претходниот циклус. Средствата во износ од по 12.000 денари, што е за 2.000 денари повеќе во однос на минатата академска година, наскоро ќе им бидат исплатени, изјави за МИА Фикрет Ибраими, одговорен во секторот за информирање во општината.
Според него, оваа финансиска помош се доделува веќе петта година по ред со цел да се мотивираат младите да го продолжат своето образование на високообразовните институции и да се трудат редовно да ги полагаат испитите.
Правото на помош може да го остварат само студенти кои се постојани жители на општината, а од започнувањето на програмата во академската 2021/22 година до сега ја оствариле 150 студенти.
Општина Маврово и Ростуше, од 2018 година, доделува еднократен паричен надоместок и за секое новороденче во семејства кои постојано живеат на нејзината територија. Пета година по ред, во септември, се исплаќа и надоместок за секое прваче.