Во Кампот за обука на вода во Охрид денеска ќе се одржи централната свеченост по повод 18 Август – Денот на Армијата, на која ќе присуствува државниот и воениот врв.
На свеченоста ќе се обратат претседателката и врховен командант на Вооружените сили, Гордана Сиљановска-Давкова, министерот за одбрана Владо Мисајловски и началникот на Генералштабот на Армијата, генерал-мајор Сашко Лафчиски.
На настанот се очекува присуство и на претседателот на Владата Христијан Мицкоски, претседателот на Собранието Африм Гаши, министри и пратеници, генерали и припадници на Армијата, поранешни министри за одбрана и началници на Генералштабот, пензионирани генерали, претставници на локалната самоуправа, организации со кои соработува Армијата и други гости.
Во рамки на одбележувањето, собраниска делегација во состав Емилија Ангелова, Оливер Спасовски и Павле Арсоски денеска ќе положи цвеќе на Споменикот на паднатите борци од НОБ во Алејата на великаните на Гробиштата Бутел, како и на вечните почивалишта на претседателите Борис Трајковски и Киро Глигоров и генералот Михаило Апостолски.
Официјалното одбележување на Денот на Армијата започна вчера со настани во Скопје и Штип. На свеченоста во касарната „Јане Сандански“ во Штип беше истакнато историското значење на 18 август 1943 година, кога на Славеј Планина бил формиран баталјонот „Мирче Ацев“, кој се смета за првата организирана воена единица на македонската војска.
Свечен собир на припадниците на Армијата и вработените во одбраната вчера се одржа и во Министерството за одбрана. На собирот се обратија министерот за одбрана Владо Мисајловски и началникот на Генералштабот, генерал-мајор Сашко Лафчиски. Мисајловски упати благодарност до вработените, истакнувајќи дека нивниот труд, посветеност и професионалност придонесуваат Министерството и Армијата да бидат меѓу најорганизираните институции во државата.
Во касарната „Илинден“ во Скопје, пак, беше извршена почесна артилериска стрелба со 10 плотуни од шест артилериски орудија на артилерискиот баталјон на Армијата.
18 Август е избран за Ден на Армијата во чест на формирањето на баталјонот „Мирче Ацев“ на Славеј Планина во 1943 година, кој се смета за првата организирана воена формација на Народноослободителната војска на Македонија.
Процесот на формирање на современата македонска Армија започна во 1992 година, кога тогашниот претседател Киро Глигоров со раководството на ЈНА го потпиша договорот за дислокација на федералната армија од територијата на Република Македонија.
Денес Армијата е дел од НАТО, најголемиот колективен систем за безбедност, откако Северна Македонија во март 2020 година стана 30-та полноправна членка на Алијансата.