ВМРО-ДПМНЕ: Ковачевски и Спасовски ја користат полицијата за партиски цели наместо за обезбедување на граѓаните
Опозициската ВМРО-ДПМНЕ обвинува дека власта ја користи полицијата само за партиски цели на СДСМ, наместо за обезбедување на граѓаните.
-СДСМ, Ковачевски и Спасовски секојдневно го допираат дното во секој поглед. Класичен пример за допрено дно во безбедносен систем е ставањето на МВР во улога на партиска полиција. Срамно е кога секојдневно има по десетици дојави за бомби низ институции и објекти, СДСМ да ги користи ресурсите на полицијата за своите партиски настани цели 24 часа однапред. Додека по цели денови се необезбедени училишта, градинки, трговски центри и многу други институции каде што учат деца и се движат граѓани, СДСМ полицијата ја користи за партиски активности, реагираат од ВМРО-ДПМНЕ.
Според партијата, несериозноста на власта е причина зошто граѓаните не се чувствуваат безбедно.
-На СДСМ, Ковачевски и Спасовски, заедно со своите партиски послушници во МВР, поважна им е безбедноста на партиските настани, отколку безбедноста на граѓаните. Несериозноста на оваа неспособна власт ги доведе граѓаните да не се чувствуваат безбедно во својата држава. Оваа Влада е најнеспособната власт во историјата на Република Македонија со најмногу скандали кои директно ја загрозуваат безбедноста на граѓаните, се вели во дописот од најголемата опозициска партија.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа