Денеска во употреба ќе биде пуштена целосно реконструираната спортска сала „Расадник“ во Кисела Вода, на настан на кој се очекува присуство на премиерот Христијан Мицкоски, министерот за спорт Борко Ристовски, градоначалничката на Кисела Вода Бети Стаменкоска Трајкоска и градоначалникот на Скопје, Орце Ѓорѓиевски.
По тој повод, општината организира целодневна програма под слоганот „Дом на спортот. Дом на идните шампиони“.
Како што информираат од Општина Кисела Вода, посетителите во текот на денот ќе имаат можност да присуствуваат на спортски и забавни активности, да се сретнат со македонски спортисти, репрезентативци и ракометарите на РК Вардар, како и да се запознаат со новите содржини на салата.
Во рамки на програмата се предвидени спортски демонстрации и фестивал, дружење со спортски легенди и актуелни шампиони, свечено отворање, ревијален натпревар меѓу РК Вардар и РК Вардар Ветерани, како и детска и забавна зона за најмладите.
Од општината посочуваат дека салата „Расадник“ претставува една од најзначајните спортски инвестиции во последниот период и се очекува да стане центар за спорт, рекреација и младински активности во Скопје.