Со василичарско оро и палење на маските, заврши Вевчанскиот карневал
Со традиционалното василичарско оро и палење на маските на двете друштва Горна и Долна маала во центарот на Вевчани, попладнево заврши годинашниот Вевчански карневал.
Со палењето на маските вевчанци веруваат дека го избркале злото и оти ќе имаат среќна и бериќетна година. Уште од утре тие ќе почнат да планираат во што ќе се маскираат следната година. Инспирирани од актуелните случувања во државата и светот на сатиричен начин ги исмеваат, но и упатуваат силни пораки кон политичарите и општеството.
Маските се поделени на традиционални, кои постојат од почетоците на карневалот: зетот, невестата, ѓаволите и глупавите августи и актуелни.
Вевчани два дена наликуваше на отворена театарска сцена, каде дефилираат голем број маскирани вевчанци, но и туристи од земјава и странство. Карактеристично за манифестацијата е што никој никому не се лути, бидејќи тоа се денови на мајтап во Вевчани.
Се претпоставува дека Вевчанскиот карневал постои повеќе од 15 века и со него се одбележува христијанскиот празник свети Василиј Велики или доаѓањето на Новата година по стариот, Јулијанскиот календар.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа