Ѓорѓиевски: Нов урбанистички план, намалување на комуналните давачки

Кандидатот за градоначалник на Куманово од коалицијата предводена од ВМРО-ДПМНЕ „За подобра Македонија“, Зоран Ѓорѓиевски, денеска одржа прес-конференција на која претстави дел од активностите.

Дел од мерките што ВМРО-ДПМНЕ ги предвидува во предизборната програма за Куманово се нов генерален урбанистички план, намалување на комуналните давачки за изградба на типски семејни А2 категории згради за 30 проценти, како и изготвување на студија за изградба на нова атмосферска канализација во Куманово.

– Еден од најглавните проекти со кои настапуваме во периодот што претстои е изготвување нов Генерален урбанистички план бидејќи стариот ГУП е истечен уште во 2012 година, пет години не е донесен нов, така што со правење нов ГУП сите оние тесни грла во Куманово ќе бидат избегнати. Со правењето нов ГУП ќе се предвиди зеленилото да биде во што поголем обем, со нови зелени решенија и со стриктно спроведување на законите за изградба на нови урбани зони, изјави Ѓорѓиевски.

Тој најави дека во новата програма се предвидува и студија со која ќе се одвои фекалната од атмосферската канализација со што, како што рече, поплавите што се случуваа на булеварот „Октомвриска револуција“ ќе станат минато за граѓаните на општина Куманово.