Министерството за животна средина и просторно планирање потпиша официјален меморандум за соработка со зоолошките градини во Скопје и Битола по повод Меѓународниот ден на биодиверзитетот.
Ресорниот министер Муамет Хоџа посочи дека целта на ова партнерство е целосна трансформација на овие установи во современи образовни центри.
„Центри кои примарно ќе се грижат за благосостојбата на животните, заштитата на дивиот свет и едукацијата на младите. Обезбедуваме долгорочна поддршка. Свесни сме дека заштитата бара ресурси. Затоа, преку БИОФОН градиме стабилни финансиски механизми. Тие директно ќе ја поддржат работата на заштитените подрачја, екосистемите, но и развојот и проектите на зоолошките градини. Сегашните чекори се инвестиција во иднината, а свеста за природата се негува од најрана возраст. Затоа, им благодарам на учениците кои учествуваат во денешната изложба. Вие сте идните чувари на нашето природно богатство – рече Хоџа.“
Министерот додаде дека богатото природно наследство на државата бара институционална и заедничка грижа со научната заедница.
Тој нагласи дека секоја локална акција има директно влијание врз глобалното зачувување на животната средина.
„Мотото на овој ден – „Делување локално за глобално влијание“ нè потсетува на една едноставна вистина: заштитата на планетата започнува од нашиот сопствен двор – изјави министерот Хоџа.“
Вршителот на должност директор на ЗОО Скопје, Катерина Костова, се обрати со посебна порака наменета пред сè за помладите генерации.
Таа ја истакна обврската за зачувување на природата како аманет кој се остава на идните поколенија.
„Сите заедно да упатиме една порака, особено до најмладите – Природата не ја наследуваме од нашите предци, ја позајмуваме од идните генерации. Нашата должност е да ја чуваме, сакаме и штитиме. Нека овој ден биде потсетник дека секој од нас може да придонесе за поубава заедница – рече таа.“
Костова се осврна на вековната традиција на Зоолошката градина Скопје, но и на новата улога што овие институции ја имаат во современото општество.
Таа најави натамошни инвестиции во инфраструктурата и проширување на капацитетите за едукација на посетителите.
„Зоолошката градина Скопје има еден век грижа, посветеност, едукација и љубов кон животните. Сто години во кои генерации деца го направија првиот чекор кон разбирање на природата. Зоолошките градини денес не се само место каде што се гледаат животни, тие се и центри за едукација, заштита на биодиверзитетот, научна работа и подигнување на јавната свест за зачувување на природата. Нашата визија е Зоолошка градина Скопје да продолжи да се развива као современ и едукативен центар, каде што ќе се учи значењето за заштитата на животинскиот свет. Продолжуваме со подобрување и реновирање на живеалиштата, со унапредување на условите за животните и ќе бидеме гордост на нашиот град – нагласи директорката Костова.“
Настанот беше заокружен со разгледување на изложба на едукативни цртежи изработени од ученици, забавна програма со детски аниматор и прошетка низ градината.