Жестока дебата меѓу власта и опозицијата се разви на денешната собраниска седница посветена на измените на Законот за основно образование.
Пратениците од опозицијата реагираат дека законското решение е направено без дебата и стручно мислење и дека со него нема да се решат проблемите, туку ќе се продлабочат. Од друга страна, пратениците од власта уверуваат дека нема да има отпуштања на наставници и нема да се намали квалитетот на наставата.
Според Сања Лукаревска од СДСМ, со реформата ќе се сведат наставниците на подобни и неподобни и наместо подобрување на квалитетот на наставата, ќе се намали квалитетот и ќе се засили иселувањето во иднина.
Нејзината партиска колешка Даниела Николова посочи дека предложените измени дополнително ќе ги централизираат процесите кај централната власт.
„Општината е основач на основните училишта, зошто е потребна согласност од министерството“, праша Николова.
Пратеникот Миле Талевски од СДСМ побара прецизна информација за бројот на училишта кои ќе се затворат, како и за тоа колку наставници ќе станат технолошки вишок.
„Ова е тотална импровизација, затоа предлагам да го повлечете овој закон“, рече Талевски.
На овие обвинувања одговорија пратениците од мнозинството, кои потенцираа дека најавената оптимизација не значи кратење на работни места во секторот.
„Се затвораат основни училишта и тоа не е затоа што некој е неспособен. Има силен процес на изградба на објекти во основното образование. Ниту еден наставник нема да остане без работа, туку работните часови ќе ги исполни со воннаставни дејности и ќе им помага на учениците“, нагласи Бојан Стојановски од ВМРО-ДПМНЕ.
Пратеничката Емилија Ангелова од ВМРО-ДПМНЕ додаде дека целта на оптимизацијата е подобра организација на наставата и правилно трошење на јавните пари, посочувајќи ги демографските проблеми како клучна причина за намалениот број на деца.
„Имаме и план и визија. Денес 174.040 основци што е над 6.500 ученици помалку отколку годината претходно и тоа не е последица на оптимизацијата, туку на сите негативни демографски политики што ги воведте вие и тогаш не понудивте никакви решенија“, рече Ангелова.