Секретарот за меѓународна соработка на СДСМ, Андреј Жерновски, смета дека премиерот Христијан Мицкоски треба да поднесе оставка бидејќи јавно признал дека телефонски разговарал со државниот јавен обвинител за конкретен предмет.
Гостувајќи во емисијата „24 Анализа“ на ТВ24, Жерновски порача дека опозицијата сериозно ја разгледува можноста за поднесување интерпелација за претседателот на Владата.
„Премиерот требаше да си поднесе оставка. Заслужува интерпелација, треба да ја размислиме таа опција. Ова не се брани“, рече Жерновски.
Тој додаде дека ваквиот потег претставува директно кршење на законските прописи и дека во демократски системи тоа повлекува итна одговорност.
„Во една држава премиер да му се јави на државен јавен обвинител е повод за оставка веднаш. Во нормална држава премиерот си дава оставка. Не е за смеење премиер да му се јави на јавен обвинител за предмет. Мицкоски го прекрши законот, законот бара оставка“, изјави секретарот на СДСМ.
Реакцијата на опозицијата следува откако премиерот Мицкоски јавно потврди дека остварил телефонски разговор со државниот јавен обвинител, Ненад Савевски, во врска со предметот за набавка на мазут, истакнувајќи дека очекува случајот повторно да биде разгледан.
Од друга страна, државниот јавен обвинител Савевски исто така потврди дека разговарал со премиерот, но тврди дека во разговорот не биле навлезени во деталите за самиот предмет.