Апелациониот суд Скопје ја преиначи првостепената пресуда и ја зголеми казната затвор за Васил Јованов на 13 години. Јованов беше првостепено осуден на 12 години затвор за „тешки дела против безбедноста на луѓето и имотот во сообраќајот“.
Апелациониот суд ја уважи жалбата на Основното јавно обвинителство Скопје, додека жалбата на обвинетиот В.Ј. ја одби како неоснована. Одлуката е донесена по јавна седница на 06.10.2025 година, а пресудата е донесена на 27.10.2025 година.
„Пресудата на Основниот кривичен суд Скопје ја преиначи во делот на кривичната санкција, на начин што обвинетиот В.Ј. од С. кој со првостепената пресуда е огласен виновен за кривично дело Тешки дела против безбедноста на луѓето и имотот во сообраќајот од член 300 став2 в.в со член 297 став 1 од Кривичниот законик, се осудува на казна затвор во траење од 13-тринаесет години“, стои во соопштението од Апелационен суд Скопје.
Во останатиот дел, првостепената пресуда е потврдена, вклучувајќи ја и забраната за управување возило од пет години и паричната казна.
Несреќата се случи во јануари годинава на булевар „Партизански одреди“ во Скопје, кога Јованов удри во Фросина Кулакова (22), која почина на лице место.
Според обвинението, Јованов во моментот на несреќата:
- Возел со брзина од 91 км/ч.
- Не поседувал возачка дозвола.
- Бил под дејство на алкохол.
- Поминал на црвено светло на пешачки премин, додека Кулакова поминувала на зелено.
Првостепено, судот зел предвид признание на вина, каење и претходна осуда за недозволена трговија со дрога при одмерување на казната. За ова кривично дело е предвидена максимална казна до 20 години затвор.
Паралелно, во Основниот кривичен суд Скопје се води судски процес и против таткото на Васил Јованов, Зоран Јованов, за кривично дело „загрозување на безбедноста на сообраќајот со опасно дејствие или средства“. Обвинителството го товари таткото дека во периодот од ноември 2022 до јануари 2025 година му дозволувал на синот да управува автомобил без возачка дозвола, иако знаел дека е повеќекратен сторител на сообраќајни прекршоци.