Општина Гази Баба денеска со комеморативен настан ќе одбележи една деценија од разорното невреме и поплавите што на 6 август 2016 година го погодија скопскиот регион и однесоа 22 човечки животи.
Комеморацијата е посветена на жртвите од трагедијата, а од Општината посочуваат дека сеќавањето на настанот треба да биде потсетник за значењето на солидарноста, превенцијата и институционалната одговорност.
На 6 август 2016 година, по силни врнежи и невреме, водата предизвика сериозни поплави во повеќе населени места. Најпогодени беа подрачјата околу Стајковци, Сингелиќ, Смилковци и Арачиново. Многу семејства останаа без своите домови, а материјалната штета беше огромна.
Според податоците од тој период, во Скопје за 24 часа биле регистрирани 92,9 литри дожд на квадратен метар. Само во првите два часа од невремето биле регистрирани повеќе од 800 молњи, а силниот ветер и поројните води предизвикале паѓање на дрвја и прекини во снабдувањето со електрична енергија.
Во текот на ноќта биле евакуирани околу 1.000 жители од погодените подрачја. Помошта за настраданите пристигнувала од сите делови на државата, а граѓаните, институциите, спасувачките екипи и хуманитарните организации се вклучиле во собирање и дистрибуција на неопходни средства.
Од Општина Гази Баба денеска изразуваат благодарност до сите кои во деновите по трагедијата помогнале на погодените жители – спасувачките екипи, Армијата, полицијата, пожарникарите, Црвениот крст, здравствените работници, волонтерите и граѓаните.
„Трагедијата од 2016 година покажа дека во најтешките моменти солидарноста и човечноста можат да ја обединат целата заедница“, посочуваат од Општината.
Оттаму додаваат дека искуството од поплавите останува важна лекција и дека продолжуваат со активности насочени кон подобрување на инфраструктурата, превенцијата и безбедноста, со цел да се намалат ризиците од идни природни непогоди.
Невремето остави длабоки последици, а 8 август 2016 година беше прогласен за Ден на жалост во тогашна Република Македонија.
По невремето, Управата за хидрометеоролошки работи соопшти дека на метеоролошката станица на Зајчев Рид бил измерен рекорден интензитет на петчасовни врнежи од 84,5 милиметри.