Украинскиот претседател Володимир Зеленски упати директни и остри критики до властите во Техеран, квалификувајќи го Иран како соучесник на Русија во војната против Украина. Според Зеленски, Иран веќе не зазема само политички став, туку дава практична помош за агресијата.
Тој потсети на трауматичниот настан од јануари 2020 година, кога беше соборен украинскиот патнички авион над Техеран, при што загинаа 176 лица. „Ние не им направивме ништо“, истакна Зеленски, обвинувајќи го Иран дека тогаш не ја презел целосната одговорност и не овозможил соодветна истрага за убиството на патниците и екипажот.
Дополнително влошување на односите, според него, се случило со испораката на иранските беспилотни летала „Шахед“ за потребите на руската војска. Зеленски тврди дека иако преку дипломатски пат добил уверувања за прекин на воената помош, Техеран продолжил со испораките и давал „лажни ветувања“, додека дроновите биле користени во напади врз украински цивили и инфраструктура.