Администрацијата на американскиот претседател Доналд Трамп повлече радикален потег во обид да ги намали цените на лековите, најавувајќи воведување царини до 100% за увезените медикаменти. Оваа мерка ќе ги погоди сите производители кои нема да постигнат договор со владата за цените или нема да го пренесат своето производство на американско тло.
Големите фармацевтски компании имаат рок од 120 дена да ги презентираат своите планови за прилагодување, додека за помалите фирми овој рок изнесува 180 дена. Целта на Вашингтон е двојна: поттикнување на домашното производство и драстично намалување на трошоците за рецептните лекови, кои во САД често се и до три пати поскапи отколку во остатокот од светот.
Веќе се постигнати договори со 17 компании, меѓу кои се и гигантите „Фајзер“ и „Ели Лили“, кои со потпишувањето добија тригодишно ослободување од овие давачки. Според новиот план, високите царини од 100% ќе важат за патентирани лекови кои не се произведуваат во САД, додека за оние кои ќе го префрлат производството, стапката ќе биде намалена на 20 проценти.