Украинскиот претседател Володимир Зеленски изјави дека руските сили во последните недели двапати се обиделе да го нападнат неговиот авион со беспилотни летала. Според неговите наводи изнесени во интервју за CBS News, овие инцидентни ситуации се дел од руската стратегија насочена кон заплашување на него и на другите странски лидери.
„Мојот претседателски авион беше во Молдавија и затоа ја нападнаа Молдавија. Кога се враќавме дома, повторно преку Кишињев, тие го направија истото“, изјави Зеленски, додавајќи дека за време на враќањето претходно овој месец, едно или две беспилотни летала влезеле во молдавскиот воздушен простор, што претходно не било јавно соопштено.
Напад врз воз со странски функционери
Зеленски се осврна и на неодамнешниот напад со руски дрон врз патнички воз во близина на украинско-полската граница, во кој се наоѓале високи странски функционери, меѓу кои и поранешниот директор на ЦИА, Дејвид Петреус.
„Можеби не знаеле дека таму имало некои Американци, или можеби, напротив, знаеле. Не им верувам. Мислам дека знаеле. Токму затоа што во тој воз имало Европејци, Американци, голема делегација, тие го нападнале“, истакна украинскиот претседател.
Детали за инцидентот во Молдавија
Инаку, авионот со кој Зеленски требало да се врати во Украина од Молдавија полетал со задоцнување. Извор од Кабинетот на украинскиот претседател за „Суспилне“ потврди дека авионот воопшто не бил во воздух за време на движењето на рускиот дрон, туку останал на земја додека украинската страна ја следела безбедносната ситуација.
Од друга страна, молдавските власти соопштија дека дронот се урнал и експлодирал на околу 160 километри од аеродромот во Кишињев. Во меѓувреме, тврдењата на норвешкиот премиер Јонас Гар Стере дека авионот „за малку избегнал“ погодок не беа официјално потврдени од властите во Кишињев.