Само претседателот Трамп и САД имаат доволно моќ да стават крај на оваа војна, изјави украинскиот претседател Володимир Зеленски по средбата со турскиот претседател Реџеп Таип Ердоган во Анкара.
Зеленски нагласи дека САД имаат одлучувачка улога во напорите за запирање на руската агресија, потенцирајќи дека Украина го поддржува „секој силен и фер предлог насочен кон ставање крај на војната“.
Овие изјави доаѓаат во време кога светските медиуми пренесуваат дека Вашингтон и Москва работат на нов мировен предлог. Според шпекулациите, планот би можел да бара значителни отстапки од Киев, вклучително и потенцијално отстапување на дополнителна територија.
„Детално разговаравме за реалните начини да се доведе војната до сигурен и достоинствен крај“, посочи Зеленски, заблагодарувајќи му се на Ердоган за дипломатските напори.
Паралелно со дипломатијата, во Киев престојува и американска воена делегација. Украинскиот министер за одбрана, Денис Шмихал, остварил средба со секретарот на Армијата на САД, Даниел Дрискол, информирајќи го за напредокот на Украина во развојот на дронови. Делегацијата, во која има и генерали, се очекува да се сретне со Зеленски по неговото враќање во земјата.