Украинскиот претседател Володимир Зеленски изјави дека Украина и европските држави наскоро ќе бидат подготвени да им презентираат на Соединетите Американски Држави финализирана верзија од мировниот предлог по неколкудневни разговори.
-Украинската и европската компонента сега се поразвиени и ние сме подготвени да им ги презентираме на нашите партнери во САД, објави Зеленски на социјалните мрежи. „Заедно со американската страна, очекуваме брзо да преземеме потенцијални чекори што е можно поизводливи“.
Тој нагласи дека Украина останува „посветена на вистински мир“ и дека „сè зависи од тоа дали Русија е подготвена да преземе ефикасни чекори за да го запре крвопролевањето и да спречи повторно појавување на војна“.
Во однос на забелешките на американскиот претседател Доналд Трамп во интервјуто за Политико, Зеленски изјави дека е секогаш подготвен за избори.
Трамп за Политико изјави дека украинската влада „користи војна за да не одржи избори“ и му рече на Зеленски дека е „важно“ земјата да оди на избори.
-Секогаш сум подготвен за избори, изјави Зеленски за италијанските медиуми, запрашан за изјавата на маргините на состанокот со италијанската премиерка Џорџа Мелони во Рим.
По средбата со Мелони, Зеленски рече дека имале „одличен и многу значаен разговор“ за војната во Украина.
„Ја цениме активната улога на Италија во креирањето конкретни идеи и дефинирањето чекори што можат да нè доближат до мирот“, рече Зеленски.