Украинскиот претседател Володимир Зеленски денеска вети дека неговата земја ќе одговори на масовниот руски напад врз главниот град Киев, кој беше изведен во текот на ноќта. Ова се смета за еден од најмасовните руски напади врз Киев од почетокот на војната пред повеќе од четири години.
Според последните информации објавени од Укринформ, кои се повикуваат на Државната служба за вонредни состојби, бројот на жртвите во главниот град се искачи на 21 лице. Во нападот се повредени уште 85 лица, меѓу кои и две деца.
Украинскиот претседател остро ги осуди нападите врз инфраструктурата и најави дејствија од украинска страна.
„– Русија напаѓа цивилни цели само за да ја принуди Украина да се откаже од својата државност, да внесе раздор меѓу граѓанското општество и војската. На тоа сметаа во текот на целата војна. Тоа нема да се случи – рече Зеленски.“
Украинскиот лидер во своето обраќање дополнително додаде дека Украина „сигурно“ ќе возврати на овие удари.
На терен, украинската полиција соопшти дека нивните службеници пронашле остатоци од руска крстосувачка ракета Х-69 со касетна боева глава во областа Оболонски.
Од друга страна, руското Министерство за одбрана преку соопштение наведе дека нападот е изведен како одговор на претходните украински напади кои предизвикаа недостиг на гориво во Русија.
Паралелно со нападот во Киев, регистрирани се воени дејствија и во другите региони. Началникот на регионалната воена администрација, Олександр Прокудин, информираше дека еден лекар е убиен, а медицинска сестра е ранета во напад врз медицинска установа во Херсон.
Во соседниот регион, три лица се ранети во напад врз административниот центар на градот Запорожје, соопшти на Телеграм началникот на тамушната регионална воена администрација, Иван Федоров.