Украинскиот претседател Володимир Зеленски изјави дека за време на состанокот со американскиот претседател Доналд Трамп во Давос побарал дополнителни ракети „Патриот“ и други системи за воздушна одбрана за Украина. Средбата се одржа во рамки на Светскиот економски форум во Швајцарија, во период кога американски претставници се подготвуваат за нови разговори во Москва со рускиот претседател Владимир Путин.
Зеленски, исто така, ја отворил можноста за трилатерални разговори меѓу руски, украински и американски тимови, кои би се одржале во Обединетите Арапски Емирати на 23 и 24 јануари.
Трамп и Зеленски разговарале повеќе од еден час во Давос, а американскиот претседател ги оцени разговорите како позитивни.
„Средбата со претседателот Зеленски беше добра. Ќе видиме како ќе заврши“, изјави Трамп во кратка изјава за новинарите, додавајќи дека неговата порака до рускиот претседател Владимир Путин е дека „војната мора да заврши“.
Набргу по изјавите на Трамп, Зеленски нагласи дека неговата главна порака до американскиот претседател била потребата од зајакнување на воздушната одбрана на Украина, поради интензивните руски напади со беспилотни летала и ракети. Според него, овие напади оставиле до еден милион луѓе без греење и електрична енергија, при температури под нулата.
„Моите последни зборови… до претседателот Трамп (беа): Не ја заборавајте воздушната одбрана, не ги заборавајте Патриотите“, изјави Зеленски, додавајќи дека тоа е „многу важно за Украина оваа зима“.