Проектот за отворање на новиот граничен премин „Струмјани – Берово“, познат како „Клепало“, влегува во сериозна фаза на реализација. Како што пренесува БНР, во Министерството за животна средина и водни ресурси на Бугарија се потпишани потребните еколошки процедури, со што се отвора патот за почеток на изградбата на инфраструктурата.
Градоначалникот на општина Струмјани, Емил Илиев, истакна дека изработката на извештаите за влијанието врз животната средина е завршена побрзо од очекуваното. Покрај тоа, веќе е одобрена и осумкилометарската траса до границата, при што е избрана поеколошка и пократка опција.
„Најтешкиот пат со одобрување на извештаите за влијанието врз животната средина е веќе завршен. Во меѓувреме, се координираат барањата за инфраструктурата на самиот премин во однос на царината и граничната контрола“, изјави градоначалникот Илиев, додавајќи дека очекува преминот да биде оперативен до крајот на 2029 година.
Од македонска страна, активностите се веќе во тек. Царинската управа на Северна Македонија уште во октомври 2024 година го започна проектот за воспоставување на преминот. Инвестицијата вреди 3,7 милиони евра, од кои 3,1 милиони евра се грант од ИПА 3 Програмата на ЕУ, а остатокот е национално ко-финансирање. Вкупните трошоци за бугарската страна изнесуваат 5,5 милиони евра.
Отворањето на „Клепало“ се очекува да го ревитализира економскиот живот во Малешевскиот крај, да го зголеми туристичкиот потенцијал и значително да го олесни движењето на луѓе и стоки меѓу двете соседни држави.