Во Основниот суд во Штип заврши главниот претрес со изведување докази и сослушување сведоци за четворицата турски државјани, обвинети за помагање при убиството на нивен сонародник. Инцидентот се случи во мај минатата година во кафуле во центарот на Штип, кога Кадир Кара со огнено оружје го лиши од живот својот сонародник.
Судијата и портпарол на судот, Сашко Георгиев, потврди дека денеска биле сослушани последните сведоци за четвртообвинетото лице. Завршните зборови на обвинителството и на одбраната се закажани за 18 февруари во 12:30 часот.
Претходно, првообвинетиот Кадир Кара веќе ја призна вината за убиството на Градскиот плоштад „Слобода“. Судот му изрече казна затвор од 17 години, како и мерка протерување од државата по издржувањето на затворската казна.