Шпанија денеска е во центарот на светското внимание поради целосното затемнување на сонцето, редок астрономски феномен кој освен голем интерес кај астрономите, предизвика и економски бум во туристичкиот сектор. Најголем прилив на посетители бележат Балеарските Острови, каде што ексклузивните понуди за набљудување достигнуваат астрономски суми.
Хотелската компанија „Мелиа Хотелс Интернешнл“ понуди ултра-луксузен пакет по цена од 200.000 евра. Оваа понуда вклучува приватен превоз, лет со приватен авион, четири ноќевања во луксузен апартман, личен возач, специјална гастрономска понуда и набљудување на потонувањето на сонцето од приватна јахта.
Паралелно со ова, наутичкиот сектор работи со максимален капацитет. Според податоците на RTVE Balearic, сите резервации за бродови и пловила за набљудување од море биле распродадени со месеци однапред.
Шпанскиот портал Cadena SER објави дека се очекуваат меѓу 1,8 и 2,9 милиони дополнителни патувања насочени кон повеќе од 350 локации низ земјата. Властите на Балеарските Острови одредија 26 официјални зони за набљудување – девет на Мајорка, девет на Менорка, шест на Ибица и две на Форментера, пренесува Última Hora.
Поради огромниот сообраќаен притисок и безбедносни ризици, Министерството за внатрешни работи на Шпанија ангажираше повеќе од 33.600 полицајци и припадници на Цивилната гарда, а 123 области се ставени под посебен безбедносен режим. Заради високите температури и сувиот период, воведен е и зголемен воздушен надзор поради опасност од пожари.
Феноменот во Љорка започнува околу 19:38 часот, додека целосната фаза настапува во 20:30 часот, кога Месечината целосно ќе го блокира сончевиот диск во траење од минута и пол, непосредно пред зајдисонце во 20:49 часот.
Американската вселенска агенција НАСА преку живо емитување ќе го пренесува настанот ширум светот, пишува Јутарњи. Според Cadena SER, една од клучните локации за опремата на НАСА е поставена во Вилалибадо, речиси напуштено село во покраината Бургос, каде што телескопите се лоцирани до романската црква Сан Салвадор.