Во општина Гази Баба денеска официјално беше означен почетокот на градежните работи за санација на мостот „Естакада“, кој претставува една од клучните сообраќајни точки за овој дел од градот и еден од најфреквентните излези од Скопје.
Проектот опфаќа реконструкција на пристапни рампи на вкупна површина од 10.000 метри квадратни, од кои 3.800 квадрати ќе бидат целосно изгребани и обновени со два нови слоја асфалт, а нов асфалтен слој ќе добие и самиот мост. Градежните активности ќе опфатат вкупна должина од 1,5 километри коловоз.
Дополнително, на терен ќе се изврши замена на рабниците, изработка на нови асфалтни тротоари, чистење, санација и бојадисување на заштитната пешачка ограда, како и замена на постоечките капаци за шахти.
Во продолжение следува целосната изјава на градоначалникот на Град Скопје, Орце Ѓорѓиевски во врска со почетокот на овој инфраструктурен проект:
„Денес, заедно со мојот колега Бобан Стефковски, го означивме почетокот на санацијата на мостот „Естакада“ во Гази Баба, проект кој со години беше барање на илјадници жители и една од најважните сообраќајни точки во овој дел од градот.
Овој мост има особено значење, затоа што се наоѓа на еден од најфреквентните излези од Скопје и претставува важна врска за граѓаните кои секојдневно се движат кон и од општините што гравитираат во овој дел. Тука минуваат работници, ученици, семејства, компании, транспорт и затоа нашата обврска е оваа сообраќајна артерија да биде безбедна, функционална и достоинствена.
Ова е вложување во безбедноста, во подобрата поврзаност и во секојдневието на илјадници граѓани. Скопје заслужува модерна, безбедна и функционална инфраструктура. Затоа најавувам дека ќе продолжиме со санација на сите мостови во градот каде што има потреба. Продолжуваме да го градиме Скопје – чекор по чекор, проект по проект, со дела што се гледаат.“