На Кипар е потврден првиот случај на вирусот Западен Нил за оваа година. Станува збор за 70-годишен маж, кој е во тешка состојба и се лекува на Одделот за интензивна нега во Општата болница во Никозија, објави кипарската новинска агенција ЦНА.
Инфектологот Аристос Аристодиму објасни дека пациентот спаѓа во мал процент од заразените кај кои вирусот може да предизвика тешка инфекција на централниот нервен систем. Според него, ваквите компликации најчесто се јавуваат кај постари лица или кај лица со ослабен имунолошки систем.
Заменик-директорката во Министерството за здравство на Кипар, Елисавет Константину, за ЦНА посочила дека Министерството има воспоставено протоколи и процедури за постапување при појава на случаи на вирусот.
По откривање на случај се спроведува засилено прскање против комарци, иако ваквите мерки се применуваат во текот на целата година.
Константину нагласила дека ситуацијата не предизвикува особена загриженост и оти нема причина за паника, и покрај зголемениот број случаи регистрирани во европските земји.
Вирусот Западен Нил на Кипар се следи од 2016 година, а регистрираните случаи досега главно биле спорадични. Исклучок биле 2019 година, кога биле регистрирани 24 случаи, и 2023 година, со девет случаи.
Во 2020, 2021 и 2025 година на Кипар не бил регистриран ниту еден случај на вирусот Западен Нил.