Денес беше потпишан Меморандум за соработка помеѓу Центарот за управување со кризи и Црвениот крст на Република Северна Македонија, од страна на директорот на ЦУК, г-дин Мухамед Али, и генералниот секретар на Црвениот крст, г-дин Саит Саити.
Со овој Меморандум се продлабочува институционалната соработка и се воспоставува цврста рамка за координирано, навремено и ефикасно дејствување во превенција, подготвеност и справување со кризни и вонредни состојби. Документот предвидува заедничко планирање, размена на информации и ресурси, организирање обуки и теренски вежби, како и развој на компатибилни системи за побрз и поефективен одговор при кризи.
Посебен акцент се става на зајакнување на оперативните капацитети, унапредување на меѓусебната координација и подигање на јавната свест кај населението, вклучително и промоција на бројот за итни повици 112.
Потпишувањето на Меморандумот претставува значаен чекор кон градење посилен и поотпорен систем за управување со кризи, во служба на заштитата на животот и здравјето на граѓаните, материјалните добра и безбедноста на државата.