Православната црква и нејзините верници на 11 септември го одбележуваат празников Отсекување на главата на Свети Јован Крстител, познат и како есенски ден на Свети Јован. Овој празник е запишан со црвена буква во црковниот календар и претставува сеќавање на страданието на светителот.
Дента се почитува строг пост, независно од тоа дали празникот паѓа во среда, петок или друг ден, а во одделни краишта обичајот налага да не се консумира храна сè до зајдисонце.
Преданието вели дека Свети Јован Крстител жестоко ги критикувал неморалот и развратот во тогашното општество, а особено управникот на Галилеја, Ирод Антипа. Ирод ја истерал својата законита сопруга и се оженил со Иродијада, сопругата на својот жив брат Филип. Поради отворените критики: „Не ти личи да ја земеш жената на брат ти“, Ирод го затворил Јован, плашејќи се отворено да го погуби поради почитта што народот ја имал кон него.
За време на роденденската прослава на Ирод, Саломија, ќерката на Иродијада, со својот танц го одушевила владетелот, по што тој ветил дека ќе ѝ исполни секоја желба. По совет на својата мајка, Саломија ја побарала главата на Свети Јован Крстител на послужавник.
Ирод го исполнил ветувањето, по што главата му била предадена на девојката, а потоа и на Иродијада. Неговите ученици го погребале телото на светителот, додека благочестива жена подоцна тајно ја пренела и ја погребала неговата глава на Елеонската Гора во Ерусалим.
Според верувањата, казната ги стигнала сите учесници во погубувањето. Ирод ја загубил битката со арапскиот цар Арета и го завршил животот во заточение заедно со Иродијада, додека Саломија трагично се удавила во река.
За овој празник традицијата налага строг пост и избегнување на консумација на црвена храна и пијалаци кои симболизираат крв, а исто така не се врши ниту тешка физичка работа.