Една од најпознатите плажи на италијанскиот остров Сардинија, Ла Пелоса, воведе строги нови правила за посетителите со цел да ја заштити својата природна средина, која секоја година привлекува туристи од целиот свет.
Локалните власти предупредуваат дека дури и обичните крпи придонесуваат за постепено исчезнување на песокот, поради што се воведени мерки што значително го менуваат начинот на кој луѓето го поминуваат времето на плажа.
На посетителите им е забрането да се сончаат директно на крпи, па наместо тоа, дозволени се само специјално изработени основи од слама или бамбус. Казната за непочитување на ова правило изнесува 100 евра и истата може да се наплати веднаш на лице место.
Покрај забраната за крпи, воведено е и ограничување на бројот на луѓе на плажата, односно максимум 1.500 посетители истовремено во текот на шпицот на сезоната. Инспекторите се постојано присутни на терен, а туристите се должни да го мијат песокот од нозете на посебно обележани места пред да заминат.
Најстрогите мерки сепак важат за обиди за отстранување на природни материјали од плажата. Казните за земање школки, чакал или песок се движат од 300 до дури 5.000 евра, а во најсериозните случаи може да следат и кривични пријави.
Додека локалните власти тврдат дека мерките се неопходни за да се зачува една од најубавите плажи на Медитеранот, дел од јавноста смета дека правилата станале премногу строги и дека го менуваат основното искуство на одмор.