Општина Кичево ги извести граѓаните дека е воведена привремена забрана за користење на водата за пиење од шест водоснабдителни објекти во градот и околните населени места.
Мерката е донесена по добиено официјално решение од Агенцијата за храна и ветеринарство (АХВ).
Одлуката за забрана е донесена врз основа на добиените резултати од лабораториските физичко-хемиски и микробиолошки анализи на примероците од водата, кои ги изврши ЈЗУ Центар за јавно здравје – Битола, согласно одредбите од Законот за безбедност на храната.
Според издаденото известување, до ново обраќање од надлежните органи, водата за пиење не смее да се користи од следните локации:
- селскиот водовод во Гарани (чешмата кај џамијата),
- патната чешма во Другово (кај разделната градба),
- јавната чешма „Бела Кула“ во Кичево,
- селскиот водовод во Стрелци (кај училиштето „Милто Гура“),
- селскиот водовод во Шутово (пункт „Милто Гура“),
- селскиот водовод во Премка (во центарот на селото).
Од Општина Кичево апелираат до сите граѓани строго да ја почитуваат изречената забрана со цел заштита на сопственото здравје, истакнувајќи дека мерката стапува на сила веднаш.
Истовремено, од локалната самоуправа појаснуваат дека водата за пиење од изворот Студенчица, односно градскиот водоводен систем кој се снабдува од овој извор, е целосно исправна, безбедна и одговара за употреба.