На традиционалната манифестација „Првенец на генерација“, вечерва им беше оддадено признание на најдобрите ученици од средните училишта во главниот град за нивниот труд, знаење и посветеност.
Оваа година, како новитет во поддршката на младите таленти, најуспешните матуранти заминаа дома со вредни технолошки награди.
„За првпат досега, лаптопи за првенците на генерацијата – признание за трудот, знаењето и посветеноста! Вечерва, на манифестацијата „Првенец на генерација“, Градот Скопје им оддаде признание на најдобрите ученици од средните училишта во нашиот град. Ова е признание за дисциплина, карактер, упорност и љубов кон знаењето, рече градоначалникот на Град Скопје Орце Ѓорѓиевски.“
Настанот испрати порака дека инвестицијата во образовниот процес останува врвен приоритет за развојот на државата.
„Оваа година, за првпат, секој првенец на генерација добива и лаптоп – алатка што ќе им помогне да продолжат да учат, истражуваат, создаваат и да ги развиваат своите таленти. Ова е порака дека нивниот труд се вреднува, нивниот успех се почитува и дека Градот Скопје верува во нивната иднина и секогаш ќе биде нивна поддршка. Образованието е најсилната инвестиција во иднината. истакна Ѓорѓиевски.“
Покрај персоналните награди, локалните власти најавија и серија капитални инвестиции и активности во насока на подобрување на училишната инфраструктура.
„Нашата поддршка за образованието продолжува и преку организирање на научно-наставен камп, летување за талентирани ученици и ученици од социјално загрозени семејства, бесплатни униформи, современи лаборатории, подобри услови во училиштата, уредени дворови, нова урбана опрема, спортски комплекси, топлотни пумпи, фотоволтаици итн, посочи Ѓорѓиевски.“
На крајот од свеченоста беа упатени и директни честитки и мотивирачки пораки до учениците, нивните родители и професори пред почетокот на заслужениот распуст.
„Драги ученици, Вашиот успех е само почеток. Пред вас се нови предизвици, нови можности и уште поголеми достигнувања. Следете го својот сон, верувајте во себе и никогаш не се откажувајте од она што ве движи напред. Честитки до сите првенци на генерацијата, до нивните родители и наставници. Ви посакувам многу успеси во иднина и убав, радосен и заслужен летен одмор, порача Ѓорѓиевски.“