Инцидентот со чартер-летот на српски државјани, кои беа вратени од аеродромот во Тиват непосредно пред Самитот ЕУ – Западен Балкан, бил резултат на иницијатива на лица од неговото опкружување, изјави српскиот претседател Александар Вучиќ, нагласувајќи дека меѓу патниците немало криминалци ниту, пак, намера за предизвикување каква било дестабилизација.
Говорејќи по пристигнувањето на самитот, Вучиќ истакна дека денес би им се извинил на црногорските домаќини за непријатностите што настанале од оваа ситуација.
„Тие немаа оружје, ништо навредливо или опасно. Дојдоа за да создадат подобра атмосфера за мене, а никој дури не ме ни праша. Таму нема криминалци“, изјави Вучиќ.
Тој појасни дека групата била составена од активисти на неговата партија, при што од вкупно 87 српски државјани, само петмина во минатото поминале низ некаква кривична постапка, но тие не претставуваат никаква безбедносна закана.
„Би ја прифатил политичката цена за погрешната проценка на некој од мојата околина. Се водеше брутална кампања Србија да биде претставена како дестабилизирачки фактор во регионот“, изјави Вучиќ.
Претседателот откри дека отпатувал во Тиват и покрај претходното предупредување од српската Безбедносно-информативна агенција (БИА) за можни ризици, нагласувајќи дека се чувствува безбедно и дека има професионално обезбедување.
Според црногорските медиуми и Антена М, француската разузнавачка служба ДГСЕ ги алармирала тамошните власти по добиени информации од белградскиот аеродром дека во авионот има лица од криминалното милје поврзани со владејачката Српска напредна странка.
Црногорската полиција официјално потврди дека чартер летот Белград – Тиват бил ставен под засилени безбедносни проверки, по што на дел од патниците им бил забранет влез во земјата бидејќи биле идентификувани како лица од безбедносен интерес.
Целиот случај добива голема политичка тежина во регионот бидејќи на самитот учествуваат највисоките претставници на ЕУ, меѓу кои Емануел Макрон, Урсула фон дер Лајен и Антонио Кошта, при што дел од аналитичарите го толкуваат инцидентот како обид за меко влијание врз Црна Гора во моментот кога таа е најблиску до членство во Унијата.