Ана Брнабиќ ја презеде функцијата вршител на должноста претседател на Србија, откако Александар Вучиќ поднесе оставка од претседателската функција. При примопредавањето, Вучиќ ѝ ги предаде претседателскиот печат и документите што ги водел како шеф на државата.
Брнабиќ досега беше претседателка на српското Собрание, а функцијата шеф на државата ќе може да ја извршува најдолго три месеци. Во тој период има овластувања да ја претставува Србија во земјата и во странство, да распишува парламентарни избори, да предлага кандидат за премиер и да ги извршува надлежностите од областа на одбраната.
По предвременото завршување на мандатот на Вучиќ, Србија треба да организира и претседателски избори. Според законските рокови, гласањето мора да се одржи најдоцна во рок од три месеци, што значи дека првиот круг треба да биде одржан најдоцна до 27 декември.
Вучиќ оставката ја поднесе за да може без претседателска функција да учествува во кампањата за вонредните парламентарни избори на 25 октомври. Тој е кандидат на СНС за премиер.