Српскиот претседател Александар Вучиќ порача дека Србија продолжува со забрзано темпо да ги зајакнува своите одбранбени капацитети. Тој нагласи дека инвестициите во војската не се насочени кон никого, туку служат како гарант за мирот и стабилноста во регионот.
Вучиќ истакна дека современата безбедносна ситуација во светот бара од државите да бидат подготвени за секакви сценарија, а Србија, како воено неутрална земја, мора да се потпре на сопствените сили.
„Србија гради силна одбрана. Нашата цел е нашата земја да биде толку силна, што никој никогаш нема да помисли да нè нападне“, изјави Вучиќ при посетата на воени капацитети.
Тој најави и натамошни набавки на софистицирано вооружување, како и зголемување на стандардот на припадниците на српските вооружени сили. Српскиот лидер подвлече дека само воено моќна Србија може да ја заштити својата територија и своите граѓани во денешните турбулентни времиња.
„Ние не се закануваме никому, но сакаме секој да знае дека Србија не е лесен плен“, додаде тој.