Српскиот претседател Александар Вучиќ ги отфрли тврдењата на опозицијата дека би можел да ја напушти Србија доколку ги загуби изборите, порачувајќи дека нема причина да бега од земјата и дека ќе остане во Србија без оглед на исходот.
Реакцијата следуваше по изјавите на претседателот на Демократската партија Срѓан Миливојевиќ, кој тврдеше дека Вучиќ ќе се обиде да ја напушти земјата по евентуален изборен пораз.
„Зошто да бегам?“, праша Вучиќ, додавајќи дека неговата власт, според него, ја изградила и развила Србија повеќе од кога било претходно. Тој истовремено оцени дека опозицијата однапред знае каков ќе биде изборниот резултат и затоа веќе реагира со обвинувања.
Вучиќ порача дека нема имот или сметки во странство и дека нема намера да ја напушти Србија.
„Секој затвор во Србија ми е поубав од сонцето на кое било друго место во светот“, рече Вучиќ, додавајќи дека е роден во Србија и дека таму ќе остане.
Српскиот претседател се осврна и на ситуацијата на Косово, нагласувајќи дека Белград ќе ги користи сите дипломатски и мирни средства за заштита на српското население. Тој рече дека Србија во моментов не сака конфликт со НАТО, но дека нема да дозволи, како што наведе, прогон на Србите.