Предвремените парламентарни избори во Србија ќе се одржат на 25 октомври, по најавата на претседателот Александар Вучиќ дека денеска напладне ќе го распушти Народното собрание и официјално ќе ги распише изборите.
Во синоќешното интервју за Радио-телевизија Србија, Вучиќ потврди дека од Владата веќе го добил предлогот за распуштање на парламентарниот состав и најави потпишување на соодветните акти.
„Прво е указот за распуштање на српскиот парламент, втората е одлуката за закажување на изборите. Ќе ги објавам обете одлуки во 12:00 часот. Изборите ќе се одржат на 25 октомври“, рече Вучиќ.
Српскиот претседател ги упати своите пораки до политичките актери и студентите, барајќи од нив конструктивен однос за време на изборниот процес.
„Им посакувам на сите успешна трка“, порача Вучиќ, изразувајќи уверување дека политичката криза во Србија ќе заврши по изборите. Тој додаде дека ќе им честита на противниците доколку победат и дека ќе прифати каков било демократски изборен резултат.
Во истото гостување, Вучиќ ги коментираше и критиките упатени кон Белград по погребот на Ратко Младиќ, кој пред Меѓународниот кривичен трибунал за поранешна Југославија беше осуден за геноцид и воени злосторства.
Запрашан за реакциите на претседателката на Европската комисија, Урсула фон дер Лајен, и претседателот на Европскиот совет, Антонио Коста, тој посочи дека немал лоша намера кон нив и ги опиша како луѓе кои отсекогаш ја поддржувале Србија.
Сепак, Вучиќ ја доведе во прашање оправданоста на критиките за присуството на луѓе на погребот на Младиќ, правејќи паралела со настани во соседството. Тој потсети на случајот со Динко Шакиќ, кому во 2008 година, според неговите зборови, му било дозволено да биде погребан во усташка униформа во Хрватска, како и на случајот со Слободан Праљак, по чие самоубиство во Хрватскиот сабор била одржана минута молчење. Исто така, Вучиќ додаде дека одлуката на Хашкиот трибунал со која шестмина хрватски офицери биле осудени била оценета како неправедна и неприфатлива во Хрватска.