Според најновите прогнози на Управата за хидрометеоролошки работи (УХМР), граѓаните треба да се подготват за променлива метеоролошка слика во текот на следната седмица. До средината на неделата ќе се задржи стабилно и релативно топло време, кое ќе биде проследено со умерен ветер од северозападен правец.
Првата поголема промена на времето се очекува во среда. Синоптичарите најавуваат дека ветерот значително ќе се засили, особено долж Повардарието каде на моменти ќе достигнува брзина и над 70 километри на час. Истиот ден, времето ќе биде променливо облачно, а во западните делови од државата има услови за краткотраен локален дожд.
Во четврток ќе преовладува променливо облачно време, додека вистинска есенска слика нè очекува пред викендот. Во петок и сабота времето ќе биде претежно облачно со локални врнежи од дожд, кои се очекува да бидат пообилни во текот на саботниот ден. Дополнително, од петок ветерот ќе го промени својот правец и ќе дува од југоисток, што значително ќе влијае на општите временски услови до крајот на неделата.