Канадскиот министер за култура Марк Милер воведе нов Предлог-закон за безбедност на социјалните медиуми, со кој се предвидува целосна забрана за пристап до овие платформи за лица под 16 години. Технолошките компании ќе можат да ги избегнат ваквите рестрикции само доколку докажат дека ефикасно ги штитат малолетниците.
Новиот предлог-закон, заведен под шифрата C-34, дефинира седум категории штетна содржина, вклучувајќи материјали кои поттикнуваат злоупотреба на деца, омраза или насилство. За непочитување на регулативите, предвидени се огромни финансиски санкции.
Прекршувањата би можеле да резултираат со казни до 10 милиони долари или до три проценти од бруто глобалниот приход на компанијата.
Како што објавува Би-Би-Си, со овој закон се воспоставува независна Комисија за дигитална безбедност на Канада која ќе ја контролира работата на мрежите, а нејзините членови ќе ги назначува федералната влада.
„Доволно е да се каже дека ќе преземеме сите разумни чекори за да обезбедиме безбедноста на децата во оваа земја“, изјави Милер пред новинарите.
Од друга страна, организациите за слобода на говорот реагираат дека прашањата за штетна содржина треба да се решаваат со постојните закони и Канадскиот кривичен законик, но граѓанскиот сектор смета дека ова е правилен чекор.
Канадскиот модел би можел да ги охрабри технолошките компании да ги подобрат политиките за заштита на корисниците, што би „имало корист не само за децата, туку и за сите Канаѓани“ – изјави Сара Остин од „Децата Прво Канада“.
Оваа радикална одлука доаѓа по масовното пукање во училиште во Британска Колумбија во февруари, кога беше откриено дека 18-годишниот напаѓач, кој уби осум лица, со месеци го користел ChatGPT за да разговара за насилство со оружје. Компанијата OpenAI беше жестоко критикувана што не пријавила ништо во полиција, по што директорот Сем Алтман испрати писмено извинување до семејствата.
Со овој потег Канада им се придружува на Австралија, Грција и Велика Британија, кои веќе воведоа или подготвуваат слични законски забрани за тинејџерите.