Православните верници претстојната сабота го слават Свети маченик Трифун, празник кој во македонската народна традиција означува почеток на пролетните активности во земјоделството. Светецот, кој настрадал на само 21-годишна возраст, останува запаметен како покровител на лозарите, градинарите и меанџиите.
Свети Трифун е роден околу 225 година во малоазиската област Фригија. Уште во детството се истакнал со способноста да лекува болни, а неговата слава станала империјална кога на 17-годишна возраст во Рим ја излекувал Гордана, ќерката на царот Гордијан. И покрај славата и даровите кои им ги разделил на сиромасите, тој завршил маченички за време на прогоните на царот Децие.
Празникот е најпрепознатлив по обредното закројување на лозјата.
„Во повеќе краишта на Македонија на овој ден рано наутро се одело во црквата каде што попот пеел молитва и светел вода. Од оваа вода… луѓето земале во шишиња и ги прскале лозјата при што го изведувале и обредното закројување“, се наведува во записите за народните обичаи.
Во Охрид и Прилеп празникот е познат и како „Свети Трипун Пијаница“, а се верува дека тој ги штити насадите од болести и временски непогоди. Денеска именден празнуваат: Трифун, Трајан, Трајанка, Трајко, Трајче и други.