Православната црква и верниците во петок на 14 август го одбележуваат споменот на Светите седум маченици Макавејски, нивната мајка Соломонија и нивниот учител, свештеникот Елеазар. Сите тие пострадаа за зачувување на својата вера во времето на сирискиот цар Антиох.
Во тој период, царот Антиох сакал по секоја цена да им го наметне елинското идолопоклонство на Евреите, а во тоа бил поддржан и од дел од тогашните ерусалимски старешини. Доаѓајќи во Ерусалим, царот наредил сите да јадат свинско месо, што било спротивно на Мојсеевиот закон и претставувало отворено одрекување од верата.
Старецот Елеазар, кој бил свештеник и еден од преведувачите на Стариот Завет на грчки јазик, одбил да ја изврши наредбата, по што бил подложен на мачења и изгорен.
По ова, царот ги одвел во Антиохија седумте браќа Макавеи: Авим, Антонин, Елеазар, Гуриј, Евсевон, Алим и Маркел, заедно со нивната мајка Соломонија. Браќата биле свирепо мачени и фрлани во оган еден по еден пред очите на нивната мајка, но ниту еден од нив не се одрекол од верата. На крајот, и нивната мајка Соломонија скокнала во огнот.
Сите тие чесно пострадале за верата околу 180 година пред Христа.
Црквата го прославува нивниот спомен и преку соодветните црковни химни.
Тропар: „Господи Боже наш, Ти Кој поглед од човека не свртуваш, смилувај се на нас кои на Тебе забораваме, еве во труд срцата Ти ги принесуваме, и како што се надеваа браќата Макавејски, телата свои за Тебе положувајќи ги, од Тебе да ги добијат во Царството на славата, дозволи да ја имаме радоста на нивната мајка, која породот на срцето го принесе, и со неа озарени, Тебе вавек да Те прославуваме.“
Кондак: „Седмочислени столбови на премудроста Божја, и седмосвешни светилници на божествената светлина, Макавеи семудри, пред мачениците преголеми маченици, заедно со нив сите на Бога молете се, да се спасат оние што ве почитуваат.“