Православните верници на 30 јули го одбележуваат празникот на светата великомаченичка Марина, во народот позната како Огнена Марија, која се почитува како борец за христијанската вера и заштитничка на жените.
Според народното верување, Света Марина пали и казнува со оган и, исто како и Свети Илија кој казнува со гром, спаѓа во редот на огнените светци.
Во македонската традиција постои обичај на овој ден, кога поради големите жештини „гори и небото и земјата“, да не се извршува никаква физичка работа.
Во народните преданија се споменуваат примери за оган и громови кои во празничните денови ги палеле житото, сеното и домовите на луѓето кои работеле на овој празник.
Света Марина била родена во Антиохија Писидиска од родители незнабожци, а дури во својата дванаесетта година слушнала за Господ Исус Христос, Неговото воплотување, чуда, крсна смрт и воскресение.
Таа се заветувала дека никогаш нема да се мажи и сакала да пострада за Христа, поради што нејзиниот татко ја замразил и повеќе не ја сметал за ќерка.
Кога царскиот намесник Олимвриј дознал дека е христијанка, побарал од неа да му биде жена, а по нејзиното одбивање ѝ наредил да им се поклони на идолите, што таа повторно го одбила.
Поради тоа, Олимвриј ја подложил на маки и ја фрлил во затвор, каде што според преданието ѝ се јавил ѓаволот во облик на страшна змија, која се распукала и исчезнала откако светителката се прекрстила.
Следниот ден судијата ја мачел со оган и вода, но откако Марина сè претрпела, на крајот била осудена на смрт со меч.