Владејачката ВМРО-ДПМНЕ преку писмено соопштение упати нови обвинувања за целосна партизација на правосудниот систем за време на мандатот на претходната власт на СДСМ и ДУИ. Како главен доказ за тврдењата дека судството било ставено под политичка контрола, партијата го посочува неодамнешното јавно сведоштво на поранешниот судија во Врховниот суд, Ристо Катевеновски.
Според ВМРО-ДПМНЕ, Катевеновски во телевизиско гостување отворено тврдел дека бил разрешен само поради тоа што одбил да постапи по барање на тогашната власт во врска со случај поврзан со поранешната министерка за внатрешни работи, Гордана Јанкулоска.
На судско рочиште кое се одвивало зад затворени врати, судијата истакнал дека нема да даде позитивно мислење за случајот и дека ќе се консултира со колегите. Партијата посочува дека одмаздата била брза: само еден ден по оваа изјава, Судскиот совет свикал итна седница на која Катевеновски бил експресно разрешен.
„Неговото разрешување не било случајно, туку дошло од тогашните власти СДС и ДУИ, односно Зоран Заев и Али Ахмети. Тоа што во изминатите години го зборуваме, дека СДС и ДУИ под своја целосна контрола го ставиле судството и обвинителството и дека судиите и обвинителите ги бирале во партиските седишта во Струмица и Зајас, веќе се потврдува со јавни сведоштва“, се наведува во соопштението.
Од ВМРО-ДПМНЕ заклучуваат дека претходната власт директно одлучувала „кој ќе се апси, а кој ќе се апстрахира од одговорност“, порачувајќи дека тоа време е завршено и дека за ваквите постапки е потребна одговорност.