ВМРО-ДПМНЕ тврди дека платите и пензиите во периодот на актуелната Влада растат со значително побрзо темпо отколку во времето на претходната власт на СДСМ и ДУИ, оценувајќи дека тоа е резултат на економските политики што ги спроведува Владата.
Од владејачката партија посочуваат дека во јуни 2017 година просечната плата изнесувала околу 22.800 денари, а во мај 2024 година достигнала 41.250 денари. Според нивната пресметка, тоа е раст од повеќе од 18.400 денари за период од седум години.
Во споредба со тоа, ВМРО-ДПМНЕ наведува дека во јули 2024 година просечната плата изнесувала околу 40.900 денари, додека во мај 2026 година надминала 49.500 денари, што е зголемување од околу 8.600 денари за неполни две години.
„Ова покажува дека во периодот на оваа Влада, наспроти критиките на опозициската СДСМ, платите растат со значително поголема динамика“, соопштија од ВМРО-ДПМНЕ.
Од партијата слична споредба прават и кај пензиите. Според нивните податоци, просечната старосна пензија во јуни 2017 година била под 15.300 денари, а во мај 2024 година достигнала над 22.900 денари.
Во јули 2024 година просечната старосна пензија изнесувала околу 22.850 денари, а во мај годинава надминала 29.700 денари, што, според ВМРО-ДПМНЕ, претставува раст од повеќе од 6.800 денари за 23 месеци.
Од владејачката партија оценуваат дека овие бројки покажуваат оти приходите на граѓаните растат со побрзо темпо отколку во претходниот период и дека ефектите од економските политики веќе се чувствуваат во семејните буџети.
ВМРО-ДПМНЕ ја обвинува претходната власт дека не направила доволно за подобрување на животниот стандард и најавува продолжување на политиките за раст на платите и пензиите, привлекување инвестиции, отворање нови работни места и зајакнување на конкурентноста на економијата.