ВМРО-ДПМНЕ обвинува дека речиси една година по преземањето на градоначалничката функција, Ванчо Митев од СДСМ сè уште не ги реализирал ветените проекти во Општина Зрновци, посочувајќи ги проблемите со водата за пиење, инфраструктурата, спортот и културните содржини.
Од партијата наведуваат дека во изминатите два месеца биле објавени два негативни извештаи од Центарот за јавно здравје, поради кои била посочена забрана за користење на водата за пиење.
ВМРО-ДПМНЕ тврди дека нема напредок ниту кај најавените локални проекти, меѓу кои оградувањето на кејот на реката Зрновка, изградбата на пешачка патека, стационар за кучиња и спортски комплекс за младите.
Во соопштението се посочува и на состојбата со спортот, со наводи дека фудбалскиот клуб згаснал, игралиштето е запуштено, а културните настани не се реализирале според најавите.
Од ВМРО-ДПМНЕ бараат градоначалникот Митев да одговори кога ќе почне реализацијата на ветените проекти и порачуваат дека жителите на Зрновци очекуваат конкретни решенија за подобрување на условите за живот.