ВМРО-ДПМНЕ со реакција до лидерот на СДСМ, Венко Филипче, во која го обвинува дека зборува за непродажба на Македонија, иако, според партијата, бил дел од владите предводени од Зоран Заев.
Од ВМРО-ДПМНЕ тврдат дека Филипче и СДСМ ги загрозувале националните интереси и дека актуелниот лидер на опозицијата, како што наведуваат, сега повторно се обидува да го отвори прашањето за идентитетот и јазикот за политички цели.
Во реакцијата се упатуваат и обвинувања за корупција и злоупотреба на јавни средства, при што од партијата наведуваат дека Филипче наводно бил поврзан со тендери, провизии и јавни набавки.
ВМРО-ДПМНЕ го обвинува Филипче и дека со своето политичко дејствување се спротивставува на инвестиции и проекти кои, според партијата, придонесуваат за економски развој и подобар животен стандард.
Од владејачката партија додаваат дека СДСМ под раководство на Филипче станал маргинална опозиција и дека граѓаните, според нив, ја препознале неговата политика.
Во соопштението ВМРО-ДПМНЕ повторно ги упатува обвинувањата кон Филипче поврзани со неговото работење во периодот на пандемијата и јавните набавки, но не се наведуваат нови докази за изнесените тврдења.
Од ВМРО-ДПМНЕ заклучуваат дека Филипче, како што оценуваат, политички делува исклучиво за враќање на власт.