ВМРО-ДПМНЕ преку партиско соопштение објави реакција на изјавата на Христијан Ефтимов од СДММ, оценувајќи дека опозициската партија покажува целосна дезориентираност во врска со инцидентот во Ново Село.
Од владејачката партија тврдат дека со денешните обраќања практично се потврдени нивните претходно изнесени информации за прекршочните и кривичните досиеја на учесниците.
„СДС и оние кои моментално ја претставуваат партијата и во случајот со Ново Село покажуваат тотална дезориентираност, едноставно не знаат каде тераат. Денес нивниот претставник од Ново Село, кој Венко Филипче го нарекува дете или воопшто учесниците во случајот во Ново Село во панична прес-конференција ги нарече деца, јавно призна дека е насилник и осуденик“, се вели во соопштението.
Според ВМРО-ДПМНЕ, изнесените информации во јавноста ги потврдуваат нивните наводи за изречените судски мерки.
„Тој практично со неговата изјава денес од Ново Село потврди дека кажувањата на ВМРО-ДПМНЕ се точни, односно дека станува збор за правосилно осудени лица на условна казна затвор за насилство и за кривично дело поседување дрога и наркотични средства. Децата како што вели Филипче, се практично роднини на лицето кое него го направи претседател на СДС, Зоран Заев, роднини кои учествувале во незаконски дејствија“, наведуваат од ВМРО-ДПМНЕ.
Во реакцијата дополнително се упатуваат остри критики до раководството на опозициската партија.
„Ова е уште една потврда дека ова не се децата, туку дека е талогот на Македонија. Ова е срамот на Македонија“, стои во партиското соопштение.