Јавната набавка за која обвинува СДСМ е спроведена на транспарентен начин и под истите услови под кои работела и претходната влада, реагираат од ВМРО-ДПМНЕ по обвинувањата за тендерите на фирмата „Дигитал оне“.
Од владејачката партија појаснуваат дека суштината на договорите е заштеда и самостојност на институциите. Според нив, наместо да се плаќа на приватни фирми за хостирање, државата сега купува сопствена опрема.
Во однос на третиот спорен договор за набавка на компјутери, од партијата тврдат дека клучниот критериум бил најниската понудена цена.
„Договорот за кој зборуваат со фирмата Дигитал оне, или постапката за оваа јавна набавка е направена под исти услови под кои правела и владата на СДС. Дополнително, да им објасниме дека за договорите за набавка на сервери, наместо да се плаќа хост на приватни правни лица, сега за прв пат поседува сервери на кои самостојно се хостираат владините апликации. Третиот споменат договор исто така е склучен во транспарентен процес и набавени се компјутери по најниска понудена цена“, се вели во реакцијата.