Во Македонија се случува градежен бум. Градежна офанзива има на секој агол од државата, се градат улици, патишта, автопатишта, градинки, училишта, се вели во соопштението од ВМРО-ДПМНЕ.
Интензивната работа и засиленото темпо во реализацијата на капиталните инвестиции, како на локално, така и на централно ниво, веќе дава резултати. По периодот на стабилизација, македонската економија, која претходно беше во слободен пад, сега почна нов период на раст.
Според податоците, економијата бележи стабилни стапки на раст на БДП од просечно 3,5% во последните шест квартали. Најголем придонес за овој раст има градежниот сектор, кој во последниот квартал од 2025 година забележа раст од импресивни 14,6%. Градежништвото е сектор со највисока стапка на раст меѓу сите економски гранки, што укажува дека инвестициите и инфраструктурните проекти се вистински двигатели на економската активност.
Градежништвото има силен мултипликативен ефект – кога се отвораат нови градилишта и инфраструктурни проекти, тоа вклучува подизведувачи, надзорни и проектантски куќи, како и добавувачи на материјали. Поради тоа растот во градежниот сектор повлекува и други економски гранки: транспорт, производство на материјали, трговија, услуги, а со тоа се зголемува и вработеноста.
Според податоците на Министерството за финансии, во првите два месеци од 2026 година, реализацијата на капиталните инвестиции бележи троцифрен раст, што претставува значително зголемување во однос на истиот период лани. По растот од 3,8% на БДП и 14,6% во градежништвото во последниот квартал од 2025 година, во почетокот на 2026 година е забележан скок од 179,7% во реализацијата на капиталните инвестиции.
Владата предводена од ВМРО-ДПМНЕ го гледа градежниот сектор како клучен мотор за економијата и активно работи на тоа овој тренд да продолжи и дополнително да се засилува. Засилената економска активност значи повеќе инвестиции во патишта, инфраструктура и објекти, повеќе работа за компаниите и нови можности за вработување.
Целта на владата е економски раст кој се темели на инвестиции, инфраструктура и реална економска активност, со фокус на долгорочна корист за граѓаните и домашното стопанство.