ВМРО-ДПМНЕ: Ако СДСМ не преговара за македонскиот јазик, ќе ја прифати предлог-резолуцијата

Откако СДСМ се изјасни дека нема да прифати собраниска расправа за предлог-резолуцијата што ја најави ВМРО-ДПМНЕ за македонските позиции во преговорите со Бугарија, опозицијата одговори дека одбивањето отвара сомнеж дека некој е подготвен да се пазари со идентитетските обележја на Македонија. Соопштението ви го пренесуваме во целост:

Доколку СДСМ и Заев навистина не преговараат за македонскиот идентитет, јазик, културна посебност согласно барањата на Бугарија, ваквата Резолуција само би ја зајакнала нивната позиција на масата.

Истовремено потсетуваме дека членовите на бугарскиот парламент без разлика на партиската, политичката и идеолошката определба  едногласно и унисоно донесоа Резолуција за Македонија, па било апсурдно македонското Собрание да нема Резолуција за македонските национални интереси.

Документот кој што Собранието на Македонија би требало да го донесе не е партиски текст туку е текст произлезен од највисоките научни, образовни и општествени институции и авторитети во Македонија како МАНУ, УКИМ и МПЦ-ОА. Во себе содржи дефиниции и позиции базирани на несоборливи факти и аргументи, кој што никој во државата не може и не смее да си дозволи заради политика да ги спори.

Несогласувањето со текст Резолуцијата и воопшто носење на ваква Резолуција е директно спорење со аргументите во декларацијата.