Децата во САД се повеќе заостануваат во читањето по пандемијата од „Ковид 19“

Децата во САД продолжија да заостануваат во вештините за читање по пандемијата „Ковид-19“, додека мал напредок е забележан во математиката, покажуваат најновите резултати од тестирањето познато како Национален испит.

Резултатите од испитот покажаа зголемена нееднаквост меѓу учениците, па најдобрите ученици почнаа да им се враќаат на своите оценки и знаења од пред пандемијата, додека учениците со пониски резултати почнаа уште повеќе да заостануваат, пренесуваат медиумите.

Најновиот испит се одржа на почетокот на 2024 година во секоја држава, а учениците од четврто и осмо одделение беа тестирани по математика и читање.

Комесарката на Националниот центар за статистика на образованието Пеги Кар рече дека „вестите не се добри“.

„Не го гледаме напредокот што ни треба за да го повратиме нивото што нашите ученици го изгубија за време на пандемијата“, рече таа.

Меѓу неколкуте светли точки во резултатите од истражувањето беше подобрувањето на резултатите од тестовите по математика за четврто одделение, каде просечната оценка се зголеми за 2 поени на скалата од 500, но сепак е три поени под просекот пред пандемијата во 2019 година.

Кога станува збор за оценките по математика, некои држави и области постигнаа значителен напредок, вклучително и Вашингтон, каде просечната оценка се зголеми за десет поени.

Просечниот резултат по математика за осмоодделенците беше непроменет од 2022 година, додека резултатите од читањето паднаа за два поени, а една третина од осмоодделенците постигнаа резултати под „основното“ во читањето, повеќе од кога било досега.

Кар изјави дека пандемијата повеќе не може да се обвинува за лошите резултати од тестовите, предупредувајќи дека образовниот систем во земјата се соочува со „комплексни предизвици“.

Меѓу државите каде што резултатите од читањето паднаа во 2024 година беа Флорида и Аризона, каде учениците беа меѓу првите кои се вратија во училницата за време на пандемијата, додека некои големи училишни системи кои имаа продолжено затворање, постигнаа придобивки во математиката во четврто одделение, вклучително и Лос Анџелес и Њујорк.

Одделот за образование на САД соопшти дека резултатите се поразителни и го одразуваат образовниот систем кој ги изневерува учениците и покрај милијардите долари годишно финансирање и повеќе од 190 милијарди долари федерална помош за пандемијата, додека републиканците во Конгресот ја префрлија вината за лошите резултати на тестовите на администрацијата на поранешниот претседател на САД, Џозеф Бајден, пренесува Танјуг.