Универзитетската клиника за психијатрија во Скопје доби необично, но исклучително корисно засилување во својот тим. Станува збор за Роџер, 2,5 годишен „чоколаден“ лабрадор, кој преку процесот на вдомување стана дел од терапевтските активности на клиниката.
Роџер е вклучен во т.н. Animal Assisted Activities (активности поддржани од животни), чија цел е да обезбедат емоционална поддршка и смиреност за пациентите. Директорката на клиниката, проф. д-р Славица Арсова, појаснува дека присуството на кучето помага во емоционалната регулација и ја зголемува мотивацијата кај пациентите за вклучување во терапијата.
За Роџер е обезбеден посебен бокс и куќичка, а неговиот работен ден започнува во 8 часот наутро во дневната болница, каде под строг надзор на стручни лица и со согласност на пациентите, нуди утеха и социјална интеракција.