Силен земјотрес со јачина од 4,7 степени според Рихтеровата скала го погоди подрачјето на Неапол во петокот вечерта, предизвикувајќи свлечишта, оштетувања на објекти, прекини во струјата и паника кај населението.
Според Националниот институт за геофизика и вулканологија на Италија (INGV), потресот бил регистриран во 19:46 часот по локално време, со епицентар во подрачјето Флегрејски Полиња (Кампи Флегреи) во близина на Солфатара, на длабочина од три километри.
Земјотресот бил силно почувствуван во Неапол, Поцуоли, Бањоли, Фуоригрота, Кварт, како и на околните острови Искија и Прочида.
Како последица на потресот, во неколку населени места дојде до прекин во снабдувањето со електрична енергија, а жителите во паника ги напуштаа своите домови.
Најсериозни оштетувања се забележани во Поцуоли, каде што се активираше свлечиште во близина на железничката станица, при што огромни карпи паднаа и уништија паркирани автомобили.
На повеќе објекти се регистрирани урнати фасади, паднати декоративни венци и оштетени балкони.
Според првичните податоци од терен, најмалку четири лица се полесно повредени, главно од парчиња стакло и делови од фасадите.
Противпожарните екипи потврдија дека нема пријавено затиснати лица под урнатините, но контролите на објектите продолжуваат.
На островот Прочида веднаш беше активиран општинскиот центар за цивилна заштита, додека на Искија се вршат проверки на инфраструктурата.
Вулканолозите истакнуваат дека ова е еден од најсилните потреси во областа откако повторно се интензивираше феноменот на брадисеизам – пост-вулканско поместување на тлото, поради што целиот регион е под постојан засилен надзор.